Poslovne vesti - Makedonija

Земјоделците ќе делат колач вреден 115 милиони евра

Буџетот за земјоделството годинава ќе изнесува 8,9 милијарди денари (околу 145 милиони евра), што е 1,2 милијарди (19,5 милиони евра) повеќе од ланскиот. Најголемо зголемување, околу 16,3 милиони евра има кај средствата за Платежната агенција преку која се реализираат субвенциите.

Како што информираат од Министерството за земјоделство, за плати се предвидени 21 милион денари помалку или 33 отсто од средствата зашто дел од вработените се префрлаат во Агенцијата за храна и ветеринарство, 28,4 проценти или 318 милиони денари се за отплата на главнина, пред се кредити за капитални проекти во водостопанството, а 20 отсто или 40 милиони се за капитални расходи, односно инвестициски активности главно за доградба и реконструкција на системите за наводнување и за чистење на речните корита.

За хидросистемите Злетовица" и Лисиче" се планирани по 23 милиони денари, за Оризарска рекаа 18 милиони, а за Јужновардарска Долина" вкупно пет милиони денари. Околу 62 милиона денари се проектирани за пошумување, 55 милиони за доизградба на новата зграда на Министерството, а 57 милиони за ставката стоки и услуги.

Согласно дистрибуцијата на средствата по програми, 45 отсто или 504 милиони се наменети за водостопанство, 22 отсто или 242 милиона за шумарство, 16,5 отсто за земјоделство и рурален развој, а 12 отсто за администрација.

Финансиската поддршка за 2011. изнесува 115 милиони што е повеќе од ветеното. Субвенциите освен што постоајно се зголемуваат, и перманетно се алоцираат, а тоа земјоделците го чувствуваат. Веќе нема драстичен пад на производството.

- Земјоделството веќе не е неатрактивна гранка од која бизнисмените бегаат, напротив некои од најреномираните почнаа тука да вложуваат. Се врати интересот за земјоделството. Земјоделците веќе не се срамат да кажат дека се занимават со оваа дејност и тоа е главниот ефект и концепт на владината политика - нагласуваат од Министерството за земјоделство.

Значителна сума од милионскиот колач или 6,8 милиони евра е одвоена и за Агенцијата за храна и ветеринарство која од први овој месец почнува со работа. Таа ќе има контрола врз целокупната храна во Македонија со исклучок на примарното земјоделско производство. Половина од вработените ќе бидат инспектори. Ова тело се очекува да им биде особено од корист на фирмите зашто ќе можат да ги решаваат проблемите на едно место. Кон системот за контрола во следните две години ќе преминат уште две институции, Фитосанитарната управа и Управата за семе и саден материјал.